«التكييف شغال بس مش بيبرد» — أكتر شكوى بتوصل لفريق الصيانة عندنا، خصوصًا في عز الصيف. قبل ما تتصل بأي حد، اعرف الأسباب السبعة الحقيقية مرتبة من الأبسط:
افحص بنفسك في دقيقتين قبل ما تتصل بحد
- الوضع على الريموت: لازم يكون Cool (رمز الثلجة) مش Fan ولا Dry ولا Auto — أشهر «عطل» بنروحله ونلاقيه إعداد ريموت.
- الدرجة المضبوطة أقل من حرارة الأوضة فعلًا (اضبط 24 وجرّب)، وسرعة المروحة مش على الأقل.
- الفلاتر: افتح غطاء الوحدة الداخلية — لو الشبك مغطّى بطبقة تراب، دي غالبًا الإجابة كلها.
- الوحدة الخارجية شغالة؟ المروحة بتلف وفيه هوا سخن طالع منها. لو الداخلية بتطلّع هوا والخارجية واقفة → اقرا السبب 6 تحت.
- الوحدة الخارجية بتاخد نفس؟ مفيش حاجة حاطة قدامها أو مغطياها، ومفيش تلج على المواسير (لو فيه تلج اقفل الجهاز واقرا مقال التلج).
1. فلاتر مسدودة (الأشهر والأسهل)
الأتربة بتسد الفلاتر فبتخنق مرور الهواء — تبريد ضعيف واستهلاك أعلى. الحل في إيدك: نضّف الفلاتر بمياه فاترة كل أسبوعين–شهر في مواسم التشغيل.
2. وحدة خارجية متسخة أو محبوسة
المبادل الخارجي المليان أتربة مش بيطرد الحرارة. كمان الوحدة المحشورة في مكان مقفول بدون تهوية بتفقد كفاءتها. محتاجة غسيل دوري باحتراف.
3. نقص شحنة الفريون — وانتبه للسبب
الفريون مش «بيخلص» لوحده — نقصه معناه تسريب في الشبكة. الفني اللي يشحن من غير ما يفحص التسريب الأول بيبيعك حل مؤقت هترجع تدفع تمنه. أصول الصنعة: فحص تسريب ثم إصلاح ثم شحن بالنوع والكمية الصحيحة.
4. قدرة أصغر من المكان
لو التكييف من أول يوم «مبيسقعش» — راجع الحساب: يمكن المكان محتاج قدرة أعلى (اقرأ مقالنا عن اختيار القدرة، أو استخدم الحاسبة). دي مش مشكلة صيانة — دي مشكلة اختيار.
5. مشاكل التركيب نفسه
مواسير أطول من اللازم بدون تعويض، عزل رديء، لحامات ضعيفة، ميول صرف غلط — أخطاء تركيب بتطارد الجهاز طول عمره. عشان كده التركيب الصح استثمار مش تكلفة.
6. الضاغط أو الكباستور
لو الوحدة الخارجية بتقف وتشتغل بشكل غريب أو مبتفصلش خالص — ممكن تكون مشكلة كباسيتور أو بداية تعب في الضاغط. دي شغل فني متخصص حصريًا.
7. تسريب هواء المكان نفسه
باب مفتوح على طرقة حارة، شباك مش محكم، شفاط بيسحب الهواء المبرد — التكييف سليم بس المكان بيضيّع تبريده.
الخلاصة: نضافة الفلاتر عليك، وأي حاجة فيها فريون أو كهرباء أو ضاغط علينا. اطلب زيارة صيانة — تشخيص بالسبب الحقيقي وقطع غيار أصلية وضمان على الشغل.
الأعراض اللي بتيجي مع «مش بيبرد» — ولكل واحدة مقال
- بيطلّع هوا مش بارد وفيه تلج على المواسير → 6 أسباب التلج وإيه اللي تعمله في اللحظة دي.
- بيبرد شوية وبعدين بيفصل ويشتغل كل شوية → 8 أسباب بالترتيب اللي بنفحصه بيه.
- الوحدة الخارجية بتزنّ ومش بتقوم → الكباسيتور: أشهر عطل في الصيف.
- حد قالك «محتاج شحن فريون» → اقرا الأول ليه الشحن السنوي أكبر غلطة، وبعدين إزاي بنعمل فحص التسريب والشحن بالوزن.
- ظهر كود على الشاشة → أكواد أعطال السبليت (كارير وميديا).
لو عدّيت على الخمس نقط اللي فوق والجهاز لسه مش بيبرد، الباقي شغلنا: اطلب زيارة فحص — بنقيس الضغطين والتيار وفرق الحرارة قبل ما نحكم، ومش بنشحن فريون على تسريب.
صفحات مرتبطة بالمقال
بنخدم المنطقة اللي إنت فيها: تكييف مدينتي · تكييف حدائق الأهرام · تكييف 6 أكتوبر — أو شوف كل مناطق الخدمة واطلب عرض سعر.