لو بتشطّب شقتك أو مكتبك وناوي تركّب تكييف حائطي، تقدر تجهّز فتحة المواسير من دلوقتي، قبل المحارة والدهان. كده مفيش تكسير بعد التشطيب، والفتحة بتستخبى كلها ورا الوحدة الداخلية. المقال ده عن التركيب «ضهر في ضهر» (Back to Back): الوحدة الداخلية على الحيطة، والمواسير والصرف بيخرجوا من ورا الجهاز على طول للناحية التانية.
جدول مكان الفتحة لكل قدرة
| القدرة | مقاس الوحدة الداخلية (سم) | من السنتر يمين | من السنتر لتحت | قطر الفتحة |
|---|---|---|---|---|
| 1.5 حصان (12,000 وحدة) | 82 × 29 × عمق 22 | 30 سم | 10 سم | 3 بوصة |
| 2.25 حصان (18,000 وحدة) | 98.5 × 31 × عمق 23 | 35 سم | 11 سم | 3 بوصة |
| 3 حصان (24,000 وحدة) | 106 × 33 × عمق 25 | 40 سم | 11 سم | 3 بوصة |
| 4 حصان (30,000 وحدة) | 125 × 35 × عمق 28 | 45 سم | 12.5 سم | 3 بوصة |
| 5 حصان (36,000 وحدة) | 125 × 35 × عمق 28 | 45 سم | 12.5 سم | 3 بوصة |
«يمين» يعني وإنت واقف قدام الحيطة وباصص على مكان الجهاز. المقاسات دي لموديلات كاريير اكس كول واكس كول انفرتر وميديا اكستريم برو (1.5 و2.25 و3 حصان)، وكاريير أوبتيماكس انفرتر وميديا ميشن انفرتر (4 و5 حصان). أي موديل تاني ممكن مقاسه يختلف.
الخطوات على الحيطة
- علّم سنتر الجهاز: حدّد مكان الوحدة الداخلية وعلّم نص عرضها ونص ارتفاعها.
- قيس من السنتر: امشي يمين بالمسافة اللي في الجدول، وانزل لتحت بالمسافة اللي جنبها. دي نقطة سنتر الفتحة.
- خرّم: فتحة قطر 3 بوصة، مايلة لبره من نص سم لـ1 سم عشان مية الصرف تنزل لبره.
4 حاجات تتأكد منها قبل التخريم
- السقف: سيب 15 سم على الأقل بين أعلى الجهاز والسقف النهائي، سواء جبس أو سقف عادي. احسبها من منسوب السقف بعد التشطيب مش قبله.
- الجنبين: 12 سم على الأقل بين الجهاز وأي حيطة جنبه.
- الصرف: خرطوم الصرف ينزل لتحت دايمًا ومن غير أي طلوع. ولو فيه ماسورة صرف منفصلة، مكانها على شمال الفتحة ولازقة فيها.
- اللي جوه الحيطة: اتأكد إن مفيش مواسير مية أو كهربا أو حديد تسليح في مكان الفتحة.
تكييف 1.5 حصان: مكان الفتحة بالرسم
الوحدة الداخلية 82 × 29 × عمق 22 سم. من سنتر الجهاز: 30 سم يمين و10 سم لتحت، والفتحة قطر 3 بوصة. الموديلات: كاريير اكس كول واكس كول انفرتر وميديا اكستريم برو.

تكييف 2.25 حصان: مكان الفتحة بالرسم
الوحدة الداخلية 98.5 × 31 × عمق 23 سم. من سنتر الجهاز: 35 سم يمين و11 سم لتحت، والفتحة قطر 3 بوصة. الموديلات: كاريير اكس كول واكس كول انفرتر وميديا اكستريم برو.

تكييف 3 حصان: مكان الفتحة بالرسم
الوحدة الداخلية 106 × 33 × عمق 25 سم. من سنتر الجهاز: 40 سم يمين و11 سم لتحت، والفتحة قطر 3 بوصة. الموديلات: كاريير اكس كول واكس كول انفرتر وميديا اكستريم برو.

تكييف 4 حصان: مكان الفتحة بالرسم
الوحدة الداخلية 125 × 35 × عمق 28 سم. من سنتر الجهاز: 45 سم يمين و12.5 سم لتحت، والفتحة قطر 3 بوصة. الموديلات: كاريير أوبتيماكس انفرتر وميديا ميشن انفرتر.

تكييف 5 حصان: مكان الفتحة بالرسم
الوحدة الداخلية 125 × 35 × عمق 28 سم. من سنتر الجهاز: 45 سم يمين و12.5 سم لتحت، والفتحة قطر 3 بوصة. الموديلات: كاريير أوبتيماكس انفرتر وميديا ميشن انفرتر.

التركيب السيفتي: الفتحة من ناحية الشمال
في بعض الأماكن ما ينفعش ربط الصواميل (وصلة مواسير النحاس بالوحدة الداخلية) يبقى ورا الحيطة، أو الفني مش هيقدر يوصله بعد كده في الصيانة. في الحالة دي بنركّب «سيفتي»: المواسير بتخرج من فتحة ناحية الشمال بدل اليمين، وربط الصواميل بيبقى تحت الجهاز على طول فيفضل سهل الوصول.
- المقاس: نفس مقاس فتحة اليمين بالظبط، لكن من السنتر ناحية الشمال: 30 سم (1.5 حصان)، 35 سم (2.25)، 40 سم (3)، 45 سم (4 و5 حصان)، ونفس النزول لتحت، والقطر 3 بوصة.
- الميل: الفتحة مايلة لتحت عشان الصرف، ومايلة ناحية الشمال عشان الكوع يرتاح تحت الجهاز والجهاز يطبع على الحيطة.
- الصرف: صرف التأسيس مكانه ثابت على اليمين في الحالتين.





أسئلة بتتكرر
ينفع أعمل فتحة التكييف قبل ما أشتري الجهاز؟
أيوه، لو عارف القدرة والموديل. مقاس الوحدة الداخلية بيختلف من موديل للتاني حتى في نفس الحصان، فالأرقام اللي هنا للموديلات المذكورة بس.
قطر فتحة التكييف الحائطي كام؟
3 بوصة (حوالي 7.5 سم). بتعدّي منها ماسورتين النحاس بالعزل وخرطوم الصرف وكابل الكهرباء.
ليه الفتحة لازم تبقى مايلة؟
عشان مية الصرف تنزل لبره لوحدها. لو الفتحة مستوية أو مايلة لجوه، المية ممكن ترجع وتنقّط جوه الأوضة.
أسيب قد إيه بين التكييف والسقف؟
15 سم على الأقل من السقف النهائي، عشان الهوا يدخل الجهاز من فوق والصيانة تبقى سهلة.
إمتى أعمل الفتحة ناحية الشمال بدل اليمين؟
لما ربط الصواميل ما ينفعش يبقى ورا الحيطة أو مش هيتوصله للصيانة. ساعتها الفتحة بتتعمل ناحية الشمال بنفس المقاس، وربط الصواميل بيبقى تحت الجهاز. ده اسمه التركيب السيفتي.
الفتحة هتبان بعد التركيب؟
لأ. بالمقاسات دي الفتحة بتبقى ورا الوحدة الداخلية بالكامل، وحرفها من تحت أعلى من قاعدة الجهاز.